Шүүхийн ерөнхий зөвлөлийн ээлжит 31 дүгээр хуралдааныг 2025 оны 08 дугаар сарын 28-ны өдөр зохион байгуулж, дараах асуудлыг хэлэлцэн шийдвэрлэлээ.

 

  1. Дүүргийн эрүү, иргэний хэргийн хялбар ажиллагааны анхан шатны шүүхийн “Хэрэг хянан шийдвэрлэх ажиллагааны систем” туршин нэвтрүүлэлтийн үр дүн, цаашид хэрэгжүүлэх ажлын төлөвлөгөөтэй танилцав. Төв аймаг дахь шүүхийн Тамгын газар, Багахангай, Налайх дүүргийн тойргийн шүүхийн Тамгын газар, Сэлэнгэ аймгийн Мандал сум дахь сум дундын шүүхийн Тамгын газарт туршин нэвтрүүлэлтийг нэмж турших, Дүүргийн Эрүү, Иргэний хялбар ажиллагааны анхан шатны тойргийн шүүхэд туршин нэвтрүүлэлтийг үргэлжлүүлэх тогтоол гаргав.
  2. Шүүхийн захиргааны үйл ажиллагааны системийн хөгжүүлэлтийн тайлан мэдээлэлтэй танилцав.
  3. Шүүгчийн сул орон тоонд сонгон шалгаруулалт зарлах тухай асуудлыг хэлэлцэж, Шүүхийн ерөнхий зөвлөлийн 2025 оны 8 дугаар сарын 28-ны өдрийн 189 дүгээр тогтоолоор анхан шатны шүүхийн 37, давж заалдах шатны шүүхийн 17, нийт 54 шүүгчийн сул орон тоонд сонгон шалгаруулалт зарлалаа.
  4. Монгол Улсын шүүхийн тухай хуулийн 32 дугаар зүйлийн 32.8 дахь хэсэгт “Ерөнхий зөвлөл энэ хуулийн 32.2.1, 32.2.2-т зааснаас бусад тохиолдолд шүүгчийн сул орон тоо гарсан бол энэ хуулийн 34.8-д заасан нэр дэвшигчийг сонгон шалгаруулалтад тэнцсэн эрэмбийн дарааллыг баримтлан, хуулийн 35.1-д заасны дагуу өргөн мэдүүлнэ.” гэж заасны дагуу анхан шатны шүүхийн шүүгчийн албан тушаалд 7, давж заалдах шатны шүүхийн шүүгчийн албан тушаалд 2 нэр дэвшигчийг томилуулах саналыг Монгол Улсын Ерөнхийлөгчид өргөн мэдүүлэхээр шийдвэрлэв.
  5. Монгол Улсын Ерөнхийлөгч 2025 оны Е/07 дугаар албан бичгээр Давж заалдах шатны шүүхийн шүүгчийн албан тушаалд томилуулахаар өргөн мэдүүлсэн 16 нэр дэвшигчийг “Монгол Улсын шүүхийн тухай хуулийн 31 дүгээр зүйлийн 31.1.5 дахь заалтад заасан болзол, шаардлагыг хангахгүй” гэх үндэслэлээр Шүүхийн ерөнхий зөвлөлийн саналыг буцаан ирүүлсэн. Монгол Улсын шүүхийн тухай хуулийн 36 дугаар зүйлийн 36.5 дахь хэсэгт заасны дагуу Ерөнхий зөвлөл Ерөнхийлөгчийн саналыг дахин нягталж, томилохоос татгалзсан үндэслэл тогтоогдоогүй тул нэр дэвшигчдийг дахин санал болгохоор шийдвэрлэлээ.
  6. Дүүргийн Эрүү, Иргэний хэргийн хялбар ажиллагааны анхан шатны тойргийн шүүхээс ирүүлсэн шүүгч сэлгэн ажиллуулах тухай зарын дагуу шүүгчдийн ирүүлсэн хүсэлтийг хэлэлцээд, Хөвсгөл аймаг дахь сум дундын анхан шатны шүүхийн шүүгч Р.Сарантуяаг тус шүүхэд сэлгэн ажиллуулахаар шийдвэрлэв.
  7. "Шүүгчид тавих болзол, шаардлагыг үнэлэх, сонгон шалгаруулах журам"-д өөрчлөлт оруулах тогтоолын төслийг хэлэлцэж батлав.
  8. "Шүүхийн захиргааны ажилтны сонгон шалгаруулалтын журам"-ыг хэлэлцэн баталж, ХЗДХЯ-нд хэм хэмжээний эрх зүйн актаар бүртгүүлэхээр шийдвэрлэв.
  9. Шүүхийн Тамгын газрын даргын албан үүргийг түр орлон гүйцэтгэгч томилох тухай асуудлыг хэлэлцэж, хүүхэд асрах чөлөө авч буй албан тушаалтны ажлыг орлох түр орлон гүйцэтгэгчийг томилов.

 

ШҮҮХИЙН ЕРӨНХИЙ ЗӨВЛӨЛ