Шүүхийн ерөнхий зөвлөл, Олон Улсын эрх зүйн хөгжлийн байгууллага (IDLO)-той хамтран Европын холбооны санхүүжилтээр хэрэгжүүлж буй “Шүүх эрх мэдлийн байгууллагын хамтын ажиллагаа ба ил тод байдал” төслийн хүрээнд зохион байгуулсан “Эрх зүйн хөтөч” туршилтаар ажиллуулах хөтөлбөрийн үр дүнгийн хэлэлцүүлэг өнөөдөр (2025.04.04) боллоо.
Хэлэлцүүлгийг нээж Шүүхийн ерөнхий зөвлөлийн Гүйцэтгэх нарийн бичгийн дарга Б.Эрдэнэтулга, Олон Улсын эрх зүйн хөгжлийн байгууллага (IDLO)-ын суурин төлөөлөгч Чарльз Болланд нар үг хэлэв.
Шүүхийн ерөнхий зөвлөлийн Гүйцэтгэх нарийн бичгийн дарга Б.Эрдэнэтулга оролцогчдод талархал илэрхийлэн, энэхүү хөтөлбөрийн эхний үе шатыг туршилтаар анхан шатны шүүхийн Тамгын газарт хэрэгжүүлсэн нь иргэдэд шүүхийн үйлчилгээ үзүүлэхэд бодит үр дүнгээ өгч, шүүхийн үйлчилгээний хүртээмжийг сайжруулж, шүүхийн захиргааны албан хаагчдын ажлын ачааллыг багасган, шүүхээр үйлчлүүлэгч иргэдийн шүүхэд итгэх итгэлийг нэмэгдүүлэхэд эерэг нөлөө үзүүлсэн болохыг онцлов.
"Эрх зүйн хөтөч" туршилтын хөтөлбөрийн хүрээнд анхан шатны 4 шүүх дээр 17 эрх зүйн хөтөч ажиллаж, 22 хоногт нийт 2520 иргэнд мэдээлэл, зөвлөгөө өгсөн байна.
Олон улсын Эрх зүйн хөгжлийн байгууллага “IDLO”-ын суурин төлөөлөгч Чарльз Болланд хэлэхдээ хөтөлбөр нь Европын Холбооны санхүүжилтээр хэрэгжиж байгаа бөгөөд цаашид илүү олон шүүхийн байранд хэрэгжүүлэх, тогтвортой ажиллуулах удирдамж боловсруулан хамтран ажиллахаа илэрхийллээ.
Хэлэлцүүлэгт Шүүхийн ерөнхий зөвлөлийн Гүйцэтгэх нарийн бичгийн дарга Б.Эрдэнэтулга, Гадаад харилцаа, хамтын ажиллагааны газрын дарга Д.Мөнхбат болон бусад албаны хүмүүс, Олон Улсын эрх зүйн хөгжлийн байгууллага (IDLO)-ын суурин төлөөлөгч Чарльз Болланд, төслийн зохицуулагч Б.Баясгалан, төслийн мэргэжилтэн Б.Ундрахбуян, "Эрх зүйн хөтөч” туршилтаар ажиллуулах хөтөлбөрийн зөвлөх Г.Энхтуяа болон эрх зүйн хөтөч нар оролцож, төслийн үр дүнг хэлэлцэн санал бодлоо солилцов.
Мэдээллийн төв