Шүүхийн ерөнхий зөвлөлийн хуралдааны тойм мэдээ
Огноо: 2025 оны 04 дүгээр сарын 03
Шүүхийн ерөнхий зөвлөлийн 2025 оны 04 дүгээр сарын 03-ны өдрийн ээлжит 14 дүгээр хуралдаанаар дараах асуудлыг хэлэлцэн шийдвэрлэв.
Шүүгчийн хувийн хэрэг хөтлөх журам:
Хуралдаанаар Шүүгчийн хувийн хэрэг хөтлөх журмыг хэлэлцэн баталлаа. Уг журмаар шүүгч өөрөө хувийн хэрэг хөтлөх гол үүрэгтэй, захиргааны байгууллага нь хувийн хэрэг хөтлөлтийг хянах чиг үүрэгтэй ажиллахыг журамлав. Цахим шүүх 2.0 системийг нэвтрүүлж байгаатай холбоотой хувийн хэрэг хөтлөлт цахим системээр явагдана.
Шүүгчийн сонгон шалгаруулалтын талаар мониторнг хийх чиглэл авах тухай:
Төлөвлөгөөнд тусгагдсан шүүгчийн сонгон шалгаруулалтын ажиллагаанд мониторинг хийх ажлын хүрээг тодорхойлж, Шүүхийн ерөнхий зөвлөлийн гишүүдээс бүрдсэн ажлын хэсэг хийхээр хэлэлцэн шийдвэрлэв.
Нээлттэй шүүх хуралдааны бичлэгийг шүүхийн цахим хуудаст байршуулах журамд нэмэлт, өөрчлөлт оруулах тухай:
Монгол Улсын Шүүхийн тухай хууль /Шинэчилсэн найруулга/-ийн 12 дугаар зүйлийн 12.6 дахь хэсэгт “Нээлттэй шүүх хуралдааны бичлэгийг шүүхийн цахим хуудаст, эсхүл шүүхийн нээлттэй бусад цахим платформд байршуулахтай холбогдсон журмыг Ерөнхий зөвлөл батална” гэж заасны дагуу Шүүхийн ерөнхий зөвлөлөөс 2024 оны 12 дугаар сарын 5-ны өдрийн №276 дугаар тогтоолоор “Нээлттэй шүүх хуралдааны бичлэгийг шүүхийн цахим хуудаст байршуулах журам”-ыг баталж, уг журмыг 2025 оны 01 дүгээр сарын 01-ний өдрөөс эхлэн дагаж мөрдөж эхлүүлсэн.
Шүүхийн тухай хуулийн 12 дугаар зүйлийн 12.7.1-д заасан хяналтын шатны бүх шүүх хуралдаан, 17.2.2-т заасан авилга, албан тушаалын хэргийг хянан шийдвэрлэх анхан болон давж заалдах шатны шүүх хуралдааныг 2025 оны 01 сарын 01-ээс шууд дамжуулж байгаа бөгөөд тус хуулийн 12.15 дахь хэсэгт заасан “Шүүхийн цахим хуудас, цахим мэдээллийн сангийн үйл ажиллагаа, түүнд мэдээлэл оруулах, байршуулах, шүүх хуралдааныг шууд дамжуулах болон олон нийтэд дуу-дүрсний бичлэгээр хүргэх, шүүхийн үйл ажиллагааны талаар мэдээлэл хүргэх журмыг Ерөнхий зөвлөл батална” гэсэн зохицуулалтад нийцүүлэн шүүх хуралдааны шууд дамжуулалтын харилцааг уг журамд нэмэлт, өөрчлөлт оруулах хэлбэрээр зохицуулах боломжтой гэж үзсэн.
Өнөөдрийн хуралдаанаар уг журамд нэмэлт өөрчлөлт оруулах асуудлыг хэлэлцээд, гишүүдийн саналаар хуульд нэрлэн заасан шүүх хуралдааныг шууд дамжуулахтай холбоотой харилцааг тус журамд тусгай бүлгээр ялгаж зохицуулах, шүүх хуралдааны дамжуулалт бүх шатны шүүхэд нэг стандартын дагуу явагдах, шууд дамжуулалтын цахим сувгийг журамд нэрлэн зааж олон нийтэд ойлгомжтой байлгах, шууд дамжуулалтад тавигдах шаардлагыг тодорхойлох зэрэг чиглэлийг өгч, ямар сувгаар шууд дамжуулсныг тооцох болон шууд дамжуулахтай холбоотой техник, технологийн асуудлыг дахин судлах шаардлага байгаа зэргийг харгалзан хойшлуулж шийдвэрлэв.
Мэдээллийн төв