Шүүхийн ерөнхий зөвлөлөөс “Шүүхийн үйлчилгээний стандарт”-ыг шинээр боловсруулан, Ерөнхий зөвлөлийн 2025 оны 3 дугаар сарын 20-ны өдрийн хуралдаанаар хэлэлцэн баталлаа.
Шүүхийн үйлчилгээний стандартын төслийг АНУ, ХБНГУ, БНХАУ, БНТУ зэрэг улсын шүүхийн үйл ажиллагаа, үйлчилгээний сайн туршлага, Улсын бүртгэлийн ерөнхий газар, Архивын ерөнхий газар, Шүүхийн шийдвэр гүйцэтгэх ерөнхий газар, зарим банкны үйлчилгээний стандартыг судалж, Стандарт, хэмжил зүйн газраас мэргэжлийн зөвлөгөө авч, “Монгол Улсын үндэсний стандартчиллын тогтолцоо 2-р хэсэг: Стандартын бүтэц ба боловсруулах дүрэм” MNS 0001-2: 2022 стандартад нийцүүлэн УИХ-ын 2024 оны 33 дугаар тогтоолоор баталсан Монгол Улсын шүүх эрх мэдлийн хөгжлийн бодлогын 4.2.1 дэх хэсэг “Шүүхийн захиргааны ажилтанд хүний эрхийг дээдлэх харилцаа, хандлага ур чадвар, ёс зүйг төлөвшүүлэх, гүйцэтгэлийн стандарт”-ыг батлах хүрээнд боловсруулан, хэлэлцэж баталлаа.
Энэ стандарт нь шүүхээр үйлчлүүлж буй хүн, хуулийн этгээд тав тухтай орчинд шүүхийн үйлчилгээг авах нөхцөлийг бүрдүүлэхэд чиглэгдсэн болно.
Монгол Улсын Их Хурлаас 2024 оны 06 дугаар сарын 05-ны өдөр баталсан Шүүх байгуулах тухай хууль /Шинэчилсэн найруулга/, Нийслэл дэх Гэр бүл, хүүхдийн хэргийн анхан шатны тойргийн шүүх, Гэр бүл, хүүхдийн хэргийн давж заалдах шатны шүүх 2026 оны 01 дүгээр сарын 01-ний өдрөөс үйл ажиллагаа явуулахтай холбогдуулан тус шүүхийг байгуулах бэлтгэл ажлын төлөвлөгөө, зааварчилгааг боловсруулж, Шүүхийн ерөнхий зөвлөлийн тогтоолоор батлуулахыг Шүүхийн ерөнхий зөвлөлийн Ажлын албанд хуралдааны тэмдэглэлд тусгаж, Захиргаа, удирдлагын газар хариуцахаар даалгав.
Мэдээллийн төв