Шүүхийн ерөнхий зөвлөлийн 2025 оны 02 дугаар сарын 8, 9, 10 дугаар ээлжит хуралдааны тоймыг хүргэж байна.
- Шүүхийн ерөнхий зөвлөлийн 2025 оны 02 дугаар сарын 06-ны ээлжит хуралдааны 24 дүгээр тогтоолоор шүүгч, шүүхийн захиргааны ажилтанд буцалтгүй тусалж олгох журмыг баталж, энэхүү тогтоолыг 2026 оны 01 дүгээр сарын 01-ний өдрөөс эхлэн мөрдөхөөр, 25 дугаар тогтоолоор Шүүхийн Тамгын газрын үйл ажиллагаанд биечлэн хийх аудитын 2025 оны төлөвлөгөөг баталлаа.
- Шүүхийн ерөнхий зөвлөлийн 2025 оны 02 дугаар сарын 13-ны ээлжит хуралдаан 29 дүгээр тогтоолоор Шүүхийн хэргийн индексийн журмыг шинэчлэн баталж, тус тогтоолыг хэрэгжүүлэх ажлыг бүх шатны шүүхийн Тамгын газрын дарга нарт даалгаж, Шүүхийн ерөнхий зөвлөлийн Ажлын албаны дарга Б.Эрдэнэтулга хэрэгжилтэд хяналт тавьж ажиллах юм. Тус журмаар хэрэг хянан шийдвэрлэх ажиллагааны системд анхан болон давж заалдах, хяналтын шатны шүүх хэрэг, нэхэмжлэл, өргөдөл, гомдол, хүсэлт бүртгэлийн дугаар, хэргийн дугаар, эрх зүйн баримт бичгийн дугаар олгох бүртгэлтэй холбоотой харилцааг зохицуулна. Мөн Багахангай, Налайх дүүргийн Иргэний хэргийн анхан шатны тойргийн шүүхийн шүүгч сэлгэн ажиллуулах захиалгад хүсэлтээ ирүүлсэн Хөвсгөл аймаг дахь сум дундын анхан шатны шүүхийн шүүгч Б.Бээжинг Шүүхийн ерөнхий зөвлөлийн гишүүний бүрэн эрхийн хугацаанд сэлгэн ажиллуулахаар (2025.02.13) шийдвэрлэв.
- Шүүгчийн өндөр насны тэтгэвэрт гарах насны дээд хязгаарт хүрсэн шүүгчийн албан тушаалаас нь чөлөөлүүлэх саналыг Монгол Улсын Ерөнхийлөгчид хүргүүллээ. Баянзүрх, Сүхбаатар, Чингэлтэй дүүргийн Иргэний хэргийн анхан шатны тойргийн шүүхийн нэр бүхий шүүгчээс ирүүлсэн чөлөө авах хүсэлтийг хэлэлцэж, Монгол Улсын шүүхийн тухай хуулиас бусад хуульд заасан үндэслэлээр шүүгчид чөлөө олгох талаар Монгол Улсын шүүхийн тухай хуульд заагаагүй тул чөлөө олгох боломжгүй гэж шийдвэрлэж, Шүүгчийн төрийн алба хаасан хугацааны нэмэгдлийн хувийг тогтоох асуудлыг 2025 оны 02 дугаар сарын 24-ний хурлаар хэлэлцэж хойшлуулав.
Мэдээллийн төв