Шүүхийн ерөнхий зөвлөл Бүгд Найрамдах Энэтхэг Улсаас Монгол Улсад суугаа Элчин сайдын яамтай хамтын ажиллагаагаа өргөжүүлж, шүүгч болон шүүхийн захиргааны ажилтнуудыг чадавхжуулах чиглэлээр Бүгд Найрамдах Энэтхэг Улсын Засгийн газрын бүрэн тэтгэлэгт богино хугацааны сургалтад хамруулах чиглэлээр ажиллаж байна.
Өнгөрсөн оны 7 дугаар сард Шүүхийн ерөнхий зөвлөлийн дарга Л.Энхбилэг болон холбогдох албаны хүмүүс Бүгд Найрамдах Энэтхэг Улсаас Монгол Улсад суугаа Онц бөгөөд Бүрэн эрхт Элчин сайд Атул Малхари Готсурвэтэй албан ёсны уулзалт хийж, шүүгч, шүүхийн захиргааны ажилтнуудыг Энэтхэг Улсын Гадаад хэргийн яамны бүрэн тэтгэлэгт сургалтад хамруулах талаар санал тавьж, Элчин сайдын зүгээс дэмжиж хамтран ажиллахаа илэрхийлсэн юм.
Бүгд Найрамдах Энэтхэг Улсын Техник, эдийн засгийн хамтын ажиллагааны хөтөлбөр (ITEC)-ийн 2024-2025 оны бүрэн тэтгэлэгт богино хугацааны сургалтад 4 шүүгч, 28 захиргааны ажилтан хамрагдах хүсэлт гаргаснаас одоогоор 2 шүүгч, 3 захиргааны ажилтан сонгон шалгаруулалтад тэнцэж8 англи хэл болон мэдээллийн технологийн чиглэлээр сургалтад амжилттай хамрагдаад байна.
Тус тэтгэлэгт хөтөлбөрийг 1964 онд Энэтхэгийн Засгийн газраас санаачилсан бөгөөд дэлхийн 160 орны 300 мянга гаруй төрийн албан хаагч, мэргэжилтнийг чадавхжуулж, туршлага хуваалцсан томоохон хөтөлбөр юм.
2021 оноос эхлэн мэдээллийн технологи, эрүүл мэнд, хөдөө аж ахуй, засаглал, бизнес эрхлэлт, эрчим хүч зэрэг салбаруудад жил бүр нийт 12,000 орчим тэтгэлэг олгодог бөгөөд энэхүү хөтөлбөрийн тэргүүлэгч түншүүдийн нэгийн хувьд Монгол Улсад мөн жил бүр иргэний болон батлан хамгаалахын чиглэлээр сургалтын тодорхой квот олгогддог байна.
Сургалтад хамрагдсан шүүгч, захиргааны ажилтнууд Ази, Өмнөд Америк, Африк тивийн 37 орны төрийн албан хаагчидтай хамт суралцсан нь салбарын олон улсын шинэ чиг хандлагыг судлах, харилцан туршлага солилцоход ихээхэн ач холбогдолтой байсан талаар сэтгэгдлээ хуваалцсан юм.
Өнөөдрийн байдлаар ITEC хөтөлбөрт нийтдээ 3,100 гаруй монгол залуус хамрагдаад байгаа нь Монгол-Энэтхэгийн боловсрол, хүний нөөцийн хөгжлийн хамтын ажиллагаа өргөжин тэлж буйн илрэл юм.
Мэдээллийн төв