Европын Холбооны санхүүжилтээр Олон улсын эрх зүйн хөгжлийн байгууллага (ОУЭЗХБ)-аас хэрэгжүүлж буй “Шүүх эрх мэдлийн байгууллагын хамтын ажиллагаа ба ил тод байдал” (2024-2026) төслийн хүрээнд Монгол Улсын шүүх эрх мэдлийн байгууллагын хэвлэл мэдээлэл болон иргэний нийгмийн байгууллагуудтай хамтын ажиллагааг сайжруулах олон улсын туршлага судлах үйл ажиллагаа Герман, Бельгийн улсуудад 2025 оны гуравдугаар сарын 15-22-ны өдрүүдэд зохион байгуулагдаж байгаа ба Шүүхийн ерөнхий зөвлөлийн Ажлын албаны Гадаад харилцаа, хамтын ажиллагааны газрын Мэдээлэл, ёслол хариуцсан ахлах мэргэжилтэн Ө.Уртнасан хамрагдаж байна.
Шүүхийн нээлттэй, ил тод байдлыг хангах, иргэдийн шүүхэд итгэх итгэлийг нэмэгдүүлэх, шүүхийн шийдвэрийг энгийн, хүртээмжтэй байдлаар олон нийтэд ойлгомжтой, нээлттэй мэдээлэх арга зүйг судлахаас гадна хэвлэл мэдээлэл, иргэний нийгмийн байгууллагуудтай үр дүнтэй хамтран ажиллах нөхцөлийг бүрдүүлэхэд энэхүү арга хэмжээний зорилго чиглэжээ.
Жишээлбэл, Герман улсын Мюнхений Дүүргийн I-р Шүүх нь олон нийттэй харилцах, мэдээлэл түгээх үйл ажиллагааг идэвхтэй явуулдаг бөгөөд дүүргийн шүүхийн дэргэд тусгай Хэвлэлийн алба ажилладаг байна. Тус албанд олон жил ажилласан, туршлагатай шүүгч, прокурорууд хуулийн дагуу сонгон шалгаруулалтаар орж, мэргэжлийн түвшинд бэлтгэгдэн ажилладаг аж. Эдгээр мэргэжилтнүүд Камерын өмнө хэрхэн биеэ бэлдэх, камертай хэрхэн харилцах, олон нийтэд мэдээлэл өгөх сургалтад хамрагддаг бөгөөд Шүүхийн шийдвэрийн тойм, шүүх хуралдаан, хууль эрх зүйн шинэчлэлийн талаар тогтмол мэдээлэл бэлтгэж, сэтгүүлчдийн сонирхсон асуултад хариулах болон олон нийтэд зориулсан мэдээллийг бэлтгэн хүргэх гэсэн хоёр чиглэлээр ажилладаг гэв.
Түүнчлэн, олны анхаарал татсан хэргүүдийн мэдээллийг урьдчилан боловсруулж, шүүхийн шийдвэрээс долоо хоногийн өмнө сэтгүүлчдэд үнэн зөв, бодит мэдээлэл өгөх тусгай тогтолцоотой.
Монголын төлөөлөгчид Европын шүүх эрх мэдлийн байгууллагуудын хэвлэл мэдээлэл, иргэний нийгмийн байгууллагуудтай хамтран ажиллаж, шүүхийн мэдээллийн ил тод байдлыг сайжруулах, олон нийтийн ойлголтыг гүнзгийрүүлэх, Герман улсын Мюнхений Дүүргийн I-р шүүхийн олон нийттэй болон хэвлэл мэдээлэлтэй харилцах үр дүнтэй сайн туршлагаас санаа авч хэрэгжүүлэх арга зүйг нэвтрүүлснээр Монгол Улсад шүүхийн үйл ажиллагаа олон нийтэд нээлттэй, ойлгомжтой болохын зэрэгцээ иргэдийн шүүхэд итгэх итгэлийг нэмэгдүүлэхэд чухал ач холбогдолтой гэж үзэж байна.
Мэдээллийн төв